Eg vil takke alle som var med frå dei ulike laga for ein fin samarbeidsfest laurdag 13. februar i Siddis-stova. Mange folk og god stemning, som ein gammaldags leikfest fekk me oppleve den kvelden. Eg vonar alle innvolverte vil væra med på å laga liknande samarbeidsarrangement i framtida  mellom dei tre laga Klepp, Sandnes og BUL.

Elles hadde me eit greit årsmøte med mange attval tysdag 9. februar. Til og med valnemnda tok attval! Dermed held Roger Strand fram som leiar for Siddis-stova og sit dermed fast i styret for Hovudlaget. Han får med seg dei same folka, Kari Olaug Tveit og Livar Voll med Jan Dalane som vara i husstyret.

Dei andre styremedlemmene i Hovudlaget, Dag Jostein Nordaker, Torill Stordalen, Lise Øzgen og Margrete Lohne Kvam, held fram om enn med nokre plassbytte. Sidan Torill gjekk av som leiar i Leikarringen held ho fram som ”vanleg” styremedlem medan Lise Øzgen tek over hennar plass etter at ho vart vald som leiar på årsmøtet i Leikarringen i slutten av januar.
Årsmøtet gjekk inn for eit nøkternt arbeidsprogram for 2010: Vidareføre arbeidsprogrammet me hadde i 2009 som gjekk på å halde i gang dei arrangementa me har hatt det siste året; ein dansefest i vårhalvåret, 17. mai, dansefesten i oktober og handverksmessa i november.

Etter BUL sitt årsmøte, kjem årsmøt i Rogaland Ungdomslag og Rogaland Mållag samt Noregs Ungdomslag og Noregs Mållag. Om de er interessert til å representere BUL på eit slikt møte så kan de gje styret eit hint. Fylkesårsmøta skal haldast i mars medan årsmøta i NM og NU vert i april etter at Noregs Ungdomslag endra sitt opplegg ved å flytte årsmøtet til siste helga i april. Fram til då får vi ”nyte” den kalde vinteren her på Sørvestlandet med mykje sol og gode ski- og skøyteforhold i låglandet. Når bladet går i trykken er kan hende all snøen vekke og våronna starta på Jæren?
Våren er jo den beste årstida her med lysare dager og ofte stabilt vær. Ofte for godt vær til å gå inn i BUL, men  Lekarringen har visst nok å jobbe med fram mot sommaren; 16 medlemmer skal til Isleik i juli samt at Leikarringen og Vibå freistar få til eit samarbeid på ein lokal kappleik i løpet av sommaren. Då er vel Setesdalskappleiken i byrjinga av august mest nærliggjande.

Meir nær foreståande er byjubileum i Sandnes som kan markere at det er 150 år sidan dei fekk bystatus. Sandens Folkedanslag har i det høve innvitert alle laga på Jæren til å bli med på ei stor markering opningsdagen 14. april med dansemyldring i sentrum. Håper mange fra BUL vil væra med på markeringa; det er jo kjempegod PR!

Så eg reknar med at det vert ein aktiv vår i Siddis-stova.

Anne Marie